Czerwony Kapturek po śląsku

Na poprawę humoru zamieszczamy znane wszystkim opowiadanie "Czerwony Kapturek" w wersji ślónskiej. Tekst pochodzi z książki Bojki Śląskie Marka Szołtyska: 

    We wsi Wilkowyje, kole Tychów, mieszkała se z rodziną mało dziołszka, keryj mama dała po ciotce dajno purpurka, czyli tako czerwono śląsko chustka.

Od tego czasu dziołszka dycki ta purpurka oblykała. Tyj małyj dziołszce ta chusta jednak była za wielgo i bestoż wyglądała w nij choby w jakim kapturze. Skuli tego ludzie zaczli godać na nia „Czerwony Kapturek”.

Kiedyś mama zawołała Czerwonego Kapturka i tak mu godo: „Pójdziesz dzisiaj odwiedzić babcie i zaniesiesz ij coś do pomaczkecynio. Mosz tukej koszyk z Konskiem kołocza i ciś. Ale dej se pozór jak pójdziesz bez las, bo wiysz, że chacharów dzisiaj niy brakuje!” Dziołszka drapko oblykła swoja czerwono purpurka, wziyna koszyk i poszła. Na drodze w lesie trafiyła jednak wilka, kery padoł: - „Kaj tak drapko lecisz dziołszko?” - „Ida tam za las, do babcie!” – godo Kapturek - „Niy godej, do babcie idziesz, ale kwiatków niy mosz” - godo wilk.

Dziołszka stanęła na chwila i napoczyna srywanie leśnych kwiatów. Ale sprytny wilk wiedział co robi i drapko polecioł pod babcino chałpa. Zaklupoł i czeko. - „Kto tam?” - zawołała babcia. - „To jo, Czerwony Kapturek!” – łocyganioł szpetnie wilk. – „Jakoś żech dzisiaj tako słabo – zawołała babcia – i niy mom siyły stanąć z łóżka. Klucz leży pod wycieraczką. Łotwórz Se sama i wlatuj!”
Na to yno wilk czekoł.Wskoczył do chałpy, Roz mlasnął i boroczka babcia zeżar na poczekaniu. Potym wilk przeblyk się za babcia, Legny do łóżka i czeko na Czewonego Kapturka.
-,,Szczynść Boże! Jak się mocie babciu – pozdrowiyła dziołszka na progu. Ale babciu czamu Wy mocie dzisioj takie Wielgie łoczy?”
-,,Coby cie lepij widzieć” - - zaś łocyganioł przebleczony za babcia wilk.
-,,A czamu macie takie wielge uszy?„
-,,Cobych cie poradziła lepij słyszeć!”
-,,No co Wom babciu takie wielge zymbiska?”
-,,Żeby cie zjeść!” – pedzioł wilk i zeżar Czerwonego Kapturka na drugie danie.

Na szczynście przełazioł kole tyj chałpy myśliwiec i usłyszał głośne wilkowe chrapanie.Wejrzoł bez łokno i ryknął: ,,Mom cie nareszcie ty pieronie!” Wzion flinta i dziada uszczeloł.Potym przeciął mu bas , z kerego wyskoczyła uratowano babcia i jej wnuczka-Czerwony Kapturek.A potym wszyscy zyłi dugo i szczynśliwie!